Was trawling the web when came across this at http://avinashkishoreshahi.wordpress.com/2008/06/29/babul-tum-bagiyaa-ke-taruvar-gopal-singh-nepali-dharmyug-1957/ . Really liked the poetry -
Babul Tum Bagiyaa Ke Taruvar (Gopal Singh Nepali, Dharmyug 1957)
Babul tum bagiya ke taruvar, ham taruvar ki chidiyaan re
Dana chugte ud jaayen ham, piya milan ki ghadiyaan re
Ud jaayen to laut na aayen, jyon moti ki ladiyaan re
Babul tum bagiya ke taruvar…….
Aankhon se aansoo nikle to peechhe take nahi mudke
Ghar ki kanya ban ka panchhi, firein na daali se udke
Baaji haari hui triya ki
Janam-janam saugaat piya ki
Babul tum goonge naina, ham aanso ki fuljhadiyaan re
Ud jaayen to laut na aayen, jyon moti ki ladiyaan re
Hamko sudh na janam ke pehle, apni kahan ataari thi
Aankh khuli to nabh ke neeche, ham the god tumhaari thi
Aisa tha wah rain-basera
Jahan saanjh bhi lage savera
Babul tum giriraj Himalaya, ham jharnon ki kadiyaan re
Ud jaayen to laut na aayen, jyon moti ki ladiyaan re
Chhitraaye nau lakh sitaare, teri nabh ki chhaya mein
Mandir-moorat, teerath dekhe, hamne teri kaaya mein
Dukh mein bhi hamne sukh dekha
Tumne bas kanya mukh dekha
Babul tum kulvansh kamal ho, ham komal pnkhudiyaan re
Ud jaayen to laut na aayen, jyon moti ki ladiyaan re
Bachpan ke bholepan par jab, chhitke rang jawani ke
Pyas preeti ki jaagi to ham, meen bane bin paani ke
Janam-janam ke pyase naina
Chahe nahin kunwaare rehna
Babul dhoondh firo tum hamko, ham dhoondhe bawariya re
Ud jaayen to laut na aayen, jyon moti ki ladiyaan re
Chadhti umar badhi to kul-maryada se ja takrayi
Pagdi girne ke dar se, duniya ja doli le aayi
Man roya, goonji shehnai
Nayan bahein, chunri pehnayi
Pehnayi chunri suhaag ki, ya daali hathkadiyaan re
Ud jaayen to laut na aayen, jyon moti ki ladiyaan re
Mantra padhe sau sadi purane, reet nibhai preet nahi
Tan ka sauda kar ke bhi to, paya man ka meet nahi
Gaan phool sa, kaante pag mein
Jag ke liye jiye ham jag mein
Babul tum pagdi samaj ke, ham path ki kankadiyaan re
Ud jaayen to laut na aayen, jyon moti ki ladiyaan re
Maang rachi aansoo ke upar, ghoonghat geeli aankhon par
Byah naam se yah leela zaahir karwayi laakhon par
…..
….
…
Ud jaayen to laut na aayen, jyon moti ki ladiyaan re
Neh laga to naiihar chhoota, piya mile bichhudi sakhiyaan
Pyar batakar peer mili to neer banin footi aankhiyaan
Hui chalakar chaal purani
Nayi jawani paani paani
Chali manane chir vasant mein, jyon sawan ki jhadiyaan re
Ud jaayen to laut na aayen, jyon moti ki ladiyaan re
Dekha jo sasural pahunchkar, to duniya hi nyari thi
Phoolon sa tha desh hara, par kaanto ki phulwari thi
Kehne ko saare apne the
Par din dopahar ke sapne the
Mili naam par komalta ke, kewal naram kankadiyaan re
Ud jaayen to laut na aayen, jyon moti ki ladiyaan re
Ved shashtra the likhe purush ke, mushkil tha bachkar jaana
Haara daanv bacha lene ko, pati ko parmeshwar jaana
Dulhan banker diya jalaya
Dasi banker ghar bar chalaya
Maa banker mamta baanti to, mahal bani jhonpadiya re
Ud jaayen to laut na aayen, jyon moti ki ladiyaan re
Man ki sez sula priyatam ko, deep nayan ka mand kia
Chhuda jagat se apne ko, sindur bindu mein band kia
Zanzeeron mein baandha tan ko
Tyag-raag se saadha man ko
Panchhi ke ud jaane par hi, kholi nayan kiwadiyaan re
Ud jaayen to laut na aayen, jyon moti ki ladiyaan re
Janam lia to jale pita-maa, yauvan khila nanad-bhabhi
Byah racha to jala muhalla, putra hua to bandhya bhi
Jale hriday ke andar naari
Us par bahar duniya saari
Mar jaane par bhi marghat mein, jal-jal uthi lakadiyaan re
Ud jaayen to laut na aayen, jyon moti ki ladiyaan re
Janam-janam jag ke nakhre par, saj-dhajkar jaayen vaari
Fir bhi samjhe gaye raat-din ham tadan ke adhikaari
Pehle gaye piya jo hamse
Adham bane ham yahan adham se
Pehle hi ham chal basein, to fir jag baatein rewadiyaan re
Ud jaayen to laut na aayen, jyon moti ki ladiyaan re
